Dårlegare økonomi i vest

Vest slit: Alt peiker på behov for nye budsjettmidlar, seier Anders Felde i Byrkjelo. Arkivfoto


– Den reelle økonomiske situasjonen er langt dårlegare for Vestlandet enn det som kjem fram i talgrunnlaget til Budsjettnemnda for jordbruket, seier leiar i Sogn og Fjordane Bondelag Anders Felde.


Bothild Å. Nordsletten


Torsdag i førre veke la Budsjettnemnda for jordbruket fram talmaterialet som dannar grunnlaget for jordbruksforhandlingane. Tala viser at inntektene i næringa har gått ned to år på rad. Trass i politiske målsettingar om inntektsvekst får bøndene ein inntektsnedgang på 14.500 kroner som vederlag for arbeid og eigenkapital frå 2016-2018. Andre grupper ligg i same periode an til å få ei lønsauke på 27.000 kroner. Medan Stortinget si målsetting er å minske gapet mellom bønder og andre, fører dette tvert om til at inntektsforskjellen har auka med over 40.000 kroner på to år.