Veke 23 - 2010 – 7. - 13. juni

 

 

Beko Liga og sonen Jarso i Yavello syner kaffiplantene som dei nett har motteke 60 stk av. Det er kraftige og fine planter. Dei har også mellom anna planta Mango og Papaya planter. Fine rader med gulerøtter veks det mellom desse som treng stor radavstand. Dei har og særs fin sukkerrør.

Regnet var ikkje slutt

Natt til lørdag kom det ei god rotbløyte på 40 mm. Det regna jamt og godt heile natta og natt til søndag 8 mm. Etterpå har vi hatt overskya ver og det er godt for ny vekst i gras og planter.

Elevar til kjøreskulen for bilsertifikat

Det er registrert 37 elevar til den nye kjøreskulen for bilsertifikat. Dei fleste er regstrerte til å ta bussertifikat og det vert omlag 15 i den klassen. Det er stor interesse for kjøreskulen. Skulen fekk kjøpt bussen for så god pris at dei nekta å tru det på forsikringsselskapet.

Forskalinga fall

Reste av forskalinga omkring det høge vanntank-tårnet, som eg sende bilde av tidlegare, rasa i marka med eit veldig brak natt til lørdag. Det var heldigvis ingen som blei skadde.

Nye bokhandlarar

I veke 16 opna den nye AFRI-bokhandelen i Yavello. Yohannes som driv den er svært godt nøgd med salget. Han har m a selt 80 biblar på 7 veker. Ny AFRI-bokhandel opna i Chencha lørdag denne veka. Det er ei gift dame på 38 år som står som eigar. Der er ingen bokhandel frå før i denne byen. I morgon 15. juni opnar ein ny AFRI-bokhandel i Gidole. Det er den sjuande i rekkja. Vi kjøpte inn mykje bøker sist eg var i Addis, men alt er levert til bokhandlaranne og det var bøker dei gjerne ville hatt meir av. Det er ei spennande utvikling.

260 birr for 60 egg

Høna hjå Dawid Hirbo i Yavello ser etter eit reir til å leggja egg i.

 

Hagegutten og eg var ein ny tur i Yavello med full bil av kaffi-planter og frukttre. Mange av bøndene der har grave ut dammar slik at dei kan vatna om regnet skulle stoppa. Mellom Konso og Yavello kjører vi nå på to timar på fin grusveg. Vedlikehald og grusing skjer heile tida. Det er mykje å fortelja frå Yavello, men nett no er det mest spennande med han som har fått Kenya kyllingane fram til egglegging. Dei 60 fyrste egga tok han med og gav til inntekt for kyrkja på søndagsgudstenesta. Eit egg for kvar høne. Prisen kom opp i 260 birr før auksjonarius lot klubba falla. Dawit som hadde gjeve egga var veldig glad. Vanlig eggpris er birr 1.25 pr stk. Elles var det salg av bæreposar med maiskolbar. Dei gjekk unna for 100 birr pr pose. Også dette er langt over vanleg marknadspris. Menigheten i Yavello er blitt eit føredøme for andre i sin gjevarglede og omsorg for arbeidet i kyrkja.

 

Verpehønsa får heil kveite midt på dagen, morgon og kveld får dei ei mjølblanding som han har kjøpt frå Kenya. Han har god medisin mot insekter på hønsa så dei er reine for utøy.

 

Ei stor brioler høne ligg og rugar, ei mindre av lokal rase har fått ut kyllingar som ho passar på.

 

Siste veka med besøk frå Norge

Veke 24 vert siste veka i Arba Minch i denne omgang. Det ser no ut til at vi får lov å koma att til hausten og vera til sommaren 2011.

Vi ventar besøk av Gunnar Hamnøy og Osvald Hindenes desse siste dagane og dei har med seg ein mann med erfaring i produksjon og konservering av frukt og juice. Som mange kjenner til er det stor Mango produksjon her og i tillegg er det bananar. I høglandet er det aukande produksjon av epler. Kva vi kan få gjort på desse få dagane gjenstår å sjå, men vi vonar å få utstyr og innføring i ein produksjon som vi berre har drive med i mindre skala før.

Arba Minch 14.06.2010
Brit Signe og Ketil Fuglestad