Kald desembersol, men varm drøs ved fjøsveggen til Jan Magnus Hillesland, medlem nummer 6000 i Rogaland Bondelag. Frå venstre Ragnar Vikingstad, Nord-Karmøy bondelag, Svein Ståle Kolstø, Jan Magnus Hillesland, Kjell Høyvik, leiar i Rogaland Bondelag og organisasjonssjef i Rogaland Bondelag, Svein Helge Harbo.
Det er 18 år sidan sist medlemstalet i Rogaland passerte 6000 på veg
oppover. Det skjedde i 1987. Toppen vart nådd i 1992 med heile 6438 medlemmar.
I 2000 var tal medlemmar på det lågaste med 5661. Medlemstalet
heldt seg på dette nivået fram til 2003. Etter dette har det vore
eit jamt tilsig av nye medlemmar.
Medlem nummer 6000, Jan Magnus Hillesland frå Avaldsnes, fekk litt meir
merksemd enn det som fylgjer med ei vanleg innmelding. Kjell Høyvik,
leiaren i Rogaland Bondelag, er glad for kvar ny medlem og vil gjerne ha fleire.
- Det er viktigare enn nokon gong med ein sterk organisasjon. Landbruket treng
gode ambassadørar som står på og syner ei offensiv satsing,
sa Høyvik og synte til lausdriftsfjøset til Hillesland som var
nytt i 2003. Hillesland driv med mjølkeproduksjon og har ein mjølkekvote
på 400 000 liter. Organisasjonssjefen i Rogaland Bondelag, Svein Helge
Harbo ynskte også Hillesland velkommen samstundes som han gav honnør
til lokallaget, Nord-Karmøy bondelag, representert ved nestleiaren Ragnar
Vikingstad.
Jan Magnus Hillesland takka for merksemda med klare forventningar til bondelaget.
- Bonderomantikken er på TV2. Kvardagen vår handlar om å fylgje
med. Auka produksjon er ein konsekvens av dagens landbrukspolitikk. Dersom
me skal få rekruttering til næringa treng me framtidsretta, stabile
rammevilkår for både einskildbønder og samdrifter, sa Hillesland.