Eksklusivt: Raudt kjøt frå utmarksbeitande drøvtyggjarar kan på sikt få ennå høgare verdi, fordi det kan bli sett på som meir eksklusivt enn kornfôra kylling, seier Christian Anton Smedshaug i AgriAnalyse. Foto: Istock / Karel Stipek

Jo, det finst ei framtid for raudt kjøt

Matproduksjonen her til lands er avhengig av gras og beite. Christian Anton Smedshaug meiner den høge dyreavhengigheita gjer oss unike i verdssamanheng og legitimerer kvifor husdyra våre, spesielt drøvtyggaren, er så viktige for norsk sjølvforsyning.

Liv Kristin Sola

Christian Anton Smedshaug frå Agri­Analyse drog tilhøyrarane med seg på ei produksjonsreise gjennom Europa og verda då han besøkte fagkonferansen Bondebonanza i Bergen 22. januar. Tema var: «Utsikter og utfordringar for norske og europeiske bønder – mest om grasbasert kjøtproduksjon.» Og det er ingen tvil – Norge er unik samanlikna med dei fleste andre land når det kjem til matproduksjon.