Ein vinnar: Frå opphaveleg å vera liten som ei ert, har tomaten blitt foredla til alskens variantar og storleikar. Som så erobra all verdas kjøkken.

MOLDROK:

Tomatanes nye mangfald

Gul, raud, grøn. Lita som ei ert, stor som eit oksehjarte. Tomaten byr på ei tilsynelatande uendeleg evolusjons- og kulturhistorie som altfor få har høyrt om.

Åsmund Bjørnstad er professor emeritus i planteforedling ved NMBU. I tillegg skriv han bøker og dikt.

Mange har merka seg at butikkane har fleire variantar av tomatar enn før. All honnør til gartneria, (dei fleste) i Rogaland, som har gjort dette mangfaldet tilgjengeleg for kundar og munnar. Den vanlege raudfargen varierer nå til gul, oransje og ein sjeldan gong grøne tomatar med tigerstriper. Den blåsvarte er ein kombinasjon av grøn og raud. Den kjem av at klorofyllet ikkje blir brote ned, saman med normalt raud farge. Den vi ikkje finn, er den klart blå, genmodifiserte med farge lik blåbær og solbær.