Bondelagsveteran: Torstein Tunheim har vore medlem i Time Bondelag og Norges Bondelag i 70 år. Her heime i godstolen med æresdiplomet.

PORTRETT:

Torstein Tunheim – landbrukets Grand Old Man

Torstein Tunheim har opplevd meir enn dei fleste. Nå ser 95-åringen frå Bryne tilbake på eit langt liv med landbruk, kultur- og lagsarbeid.

Sjur Håland

Då han var ganske ung, på 1930-talet, samla folk seg heime i stova på Tunheim ein kveld og snakka om krigen som kunne koma.

– Eg hugsar enno alvoret og den spesielle stemninga frå den kvelden, seier han.

Langt frå alt var like alvorleg. Ein gong i konfirmasjonsalderen var Torstein med ein bureisar på dyrking. Med steinbukk, sjølvsagt. Bureisaren stod og festa klypa rundt ein stein. Torstein stod klar i eine snuen (sveiva) og venta på at bureisaren skulle gripa snuen i andre enden. «Tissa først, så i snuen», sa bureisaren.