Nokon å snakka med: F.v. Roman Benz, som er leiar for legetenestar i Sandnes kommune og vegleiar for kontaktpersonane i nettverket: Geirmund Øglend, Jarle Medalen, Bjarne Mæland, Stein Ove Byberg, Anita Jensen, Arve Fløysvik, Kristine Hognestad. Foto: Brit Jorunn Haslemo

Sikkerheitsnettet mot psykisk uhelse i landbruket vert sterkare. Nå er også Sandnes og Kvitsøy med i ordninga.

Bothild Å. Nordsletten

​Sjølv med mykje merksemd kring bondens mentale helse, er det ikkje nødvendigvis enkelt for den einskilde som slit å søkja hjelp. Bondens nettverk er ei av ordningane som ønskjer å gjera det lettare. Frå før av er nettverket av frivillige kontaktpersonar godt etablert i kommunane i Innlandet fylke. Sidan har det spreidd seg til fleire kommunar i Rogaland. Siste tilskot til nettverket er Sandnes og Kvitsøy, der sju ressurspersonar er tilgjengelege for bønder som treng nokon å snakka med.

Landbrukssjef i Sandnes kommune, Brit Jorunn Haslemo, har vore aktiv i etableringa. Ho forklarar kvifor den aktive landbrukskommunen nå kjem med.

– Ein bonde har eit stort ansvar kvar einaste dag. For alle bønder kan det oppstå situasjonar eller hendingar som kan vera vanskelege å handtera aleine. Det kan bli vanskeleg å tenkja klart, anten det er ei akutt krise eller ein belastande situasjon som har tæra på over tid. Det er nettopp det Bondens Nettverk kan hjelpa med. Å få oversikt og legga ein plan for å normalisera situasjonen.

Haslemo understrekar at kontaktpersonane i nettverket har absolutt teieplikt overfor tredje person.

– Det er berre den som ringer på vegne av seg sjølv eller andre, som kan gi tillating til å be om hjelp frå andre instansar, seier ho.