Tar sats: Marita Frafjord Oftedal og Håkon Oftedal har satsa friskt med nytt lausdriftsfjøs. I tillegg driv dei med slaktekyllingproduksjon, og snart er sauene på plass i nytt hus.

Gull med mjølkerobot

Marita Frafjord Oftedal (32) og Håkon Oftedal (33) er bønder på Øvre Oltedal i Gjesdal kommune. Med to små barn, nytt fjøs og fleire produksjonar på garden, har det gått slag i slag dei siste åra.

Sjur Håland​

Det gjeld å koma i gang tidleg, seier Håkon.

– Er du førti år, er du tjue år for seint ute.

Det første som slår ein i lausdrifts­fjøset på Øvre Oltedal, er kor reint og ryddig det er. I kontor- og serviceavdelinga kan ein gå på sokkane. Det er nytt, lyst og velstelt. Alt har sin faste plass. Lenger inne i det luftige fjøset på 30 gonger 75 meter ligg kyrne roleg på vassmadrassane medan mjølkeroboten durar jamt i bakgrunnen. Ein skraperobot glir forbi og held spaltegolvet reint. Det er stilt og harmonisk.