Roar Lima Grødeland Foto: FKRA

Klepp-bonde Roar Lima Grødeland er ny styreleiar i Felleskjøpet Rogaland Agder.

 Sjur Håland

Den nye leiaren lovar stø kurs vidare for konsernet, som hadde ei omsetning på drygt 4,3 milliardar kroner i 2025.

– Det blir ei vidareføring, der innføringa av det nye data- og forretningssystemet (ERP) blir svært viktig i tida som kjem. Å få dette til å fungera godt vil gi positive ringverknader og har høg prioritet, seier den nyvalde leiaren.

Valet skjedde på første dag av årsmøtet, 23. mars, og var i tråd med valkomiteen si innstilling. Lima Grødeland tek over leiarklubba etter Sveinung Svebestad, som går ut av styret etter åtte år som leiar.

Stø kurs handlar i følgje den nye styreleiaren også om at FKRA skal vera ein stabil og føreseieleg leverandør av kraftfôr, gjødsel, såvarer og alt det andre som høyrer med.

– Me skal levera kvalitetskraftfôr kvar dag, slik me alltid har gjort. Då er det viktig at selskapet fungerer optimalt til ei kvar tid.

Å styra eit stort selskap i ei uroleg tid med utstrekt handel over landegrensene er krevjande. Lima Grødeland har skaffa seg solid erfaring som styremedlem i FKRA dei siste åtte åra.

– På sett og vis kan ein seia at urolege tider har blitt den nye normalen sidan koronapandemien. Felleskjøpet Rogaland Agder skal vera ein del av den stabiliteten landbruket i Noreg treng. Målet er å tryggja bonden på både kort og lang sikt. Selskapet har ein lang historikk og ein lang horisont, seier Roar Lima Grødeland.