Foto: Istock / Alexander62
ATTLEGG:
Nortura aukar engrosprisane på kjøt og egg
Nortura har fastsett planlagt gjennomsnittleg engrospris (PGE) for storfe, gris, lam og egg for andre halvår 2026.
Prisane blir auka for alle dyreslag, medan eggprisen blir justert opp for å dekkja inn kostnader knytte til kjønnssortering av rugeegg.
Bakgrunnen er mellom anna god etterspurnad etter norsk kjøt og tomme reguleringslager for fleire dyreslag.
– Det er god etterspurnad i kjøtmarknaden, og ein kunne i periodar ha selt meir norsk kjøt. Dette gir rom for prisauke for alle dyreslag, seier direktør i Norsk egg- og kjøttråvare (Noek), Rolf Gjermund Fjeldheim.
Storfe
For storfe aukar engrosprisen med tre kroner til 82,80 kroner per kilo. Nortura peikar på godt sal gjennom året, tomme reguleringslager og periodar med tollfri import som teikn på sterk marknad.
Gris
For gris blir snitt-engrospris auka med éi krone til 49,90 kroner per kilo. Også her har det vore godt sal og tomme lager, men Nortura meiner det er avgrensa rom for større prisauke på grunn av svakare etterspurnad etter enkelte delar av slaktet.
Lam
Lam får ein prisauke på to kroner til 96,50 kroner per kilo. Nortura viser til god etterspurnad etter norske lam og at det ikkje vart lagt lam på reguleringslager i fjor haust.
Egg
Eggprisen blir auka med 30 øre til 31,40 kroner per kilo. Nortura understrekar at dette ikkje er ein realprisauke, men ei justering for å finansiera innføring av kjønnssortering av rugeegg som dyrevelferdstiltak. Samstundes ventar ein auka eggproduksjon og behov for produksjonsregulerande tiltak i periodar med svakt sal.
Kjelde: Nortura
Noek og Nortura:
Nortura er marknadsregulator for kjøt og egg i Noreg, medan Norsk egg- og kjøttråvare (Noek) har det operative ansvaret for marknadsreguleringa. Målet er å sikra stabile prisar, trygg matforsyning og føreseielege vilkår for bøndene.
