Ingen vinnar: Jordbruket på Jæren og andre sentrale område blir sjeldan ein vinnar i kampen om tilskotskronene, skriv Bjørn Lende. Foto: Bjørn Georg Øie

KRONIKK:

Jæren kjem dårleg ut av jordbruksavtalen

Det er ikkje nytt at landbruk i sentrale strøk får mindre tilskot, men det kan vere skummelt å ta produksjonsviljen for gitt.

Bjørn Lende, bonde og lærar, Jæren.

Det er lenge sidan partane i jordbruksforhandlingane har vist så stor entusiasme for resultatet som er oppnådd på pressekonferansen etter inngått avtale. Avtalen er på fleire måtar og historisk. Ut frå dei føresetnader som er lagt til grunn, og det talgrunnlaget som stortinget har vedteke skal jordbruket etter denne avtalen vere jamstilt med andre grupper i inntekt i 2027. Det inneber nok og at sjølv om mange i jordbruket (les småbrukarlaget) hevdar at kampen om eit rettferdig talgrunnlag held fram, er det denne måten å rekne på som blir gjeldande i lang tid framover.