Heidra for å ta vare på kultur og landskap: Gunleik Mæland fekk tildelt den nasjonale kulturlandskapsprisen for måten han har utvikla Rørtveit gard på. Han får prisen for sitt engasjement for stølsdrift, bevaringsverdige kurasar og tradisjonsbygg, lokal foredling av mat og skjøtsel av kulturlandskapet. Foto: Rørtveit Gard.

DYRSKU’N:

Meir enn ein pris

Gunleik Mæland reiste til Dyrsku’n med fem kyr og fekk éin av tre førstepremiar. Men det var ei anna utmerking som hang endå høgare for Flatdalsbonden.

Liv Kristin Sola, skribent

Blant dei mange prisane som blir delt ut til folk og fe under dyrskuhelga, er det éin som etter Bondevennen si meining fort kan gå litt under radaren; den nasjonale kulturlandskapsprisen.

Prisen blir årleg delt ut til bønder, grunneigarar eller organisasjonar som gjer ein ekstra innsats for å halde bygder og kulturlandskap opne og i god hevd. Det er altså inga tevling du melder deg på, men ein takk og ei anerkjenning av arbeidet som blir gjort for å skjøtte kulturlandskapet.