Klargjering av såmaskinen: Blå himmel og fjåge fjes då Strip-Till såmaskinen til Tonje og Livar vart lada med ei eksklusiv blanding fangvekstfrø 27. august. F.v.: Tonje Berge Eikeland, Livar Stokkeland og Atle Lende.

Fangvekstar skal binda både nitrogen og jord

Å så fangvekstar etter hausting av korn, grønsaker eller poteter er i vinden som aldri før. Rogalandsbøndene kan nå få 400 kroner målet i tilskot.

Sjur Håland​

– Berre aktuelt dersom du får hausta hovudgrøda innan rimeleg tid. Det nyttar ikkje å så fangvekst dersom det blir for seint på hausten, seier NLR-rådgivar Atle Lende.

Han står med ei ause ned i ein sekk med frø og er i ferd med å vega opp ein miks som skal rett i såmaskinen til bøndene Tonje Berge Eikeland og Livar Stokkeland på Brusand, sør i Hå kommune på Jæren.