Norgesmeisterskap i pløying

Traktorar og plogar i alle variantar og årgangar var representert på Voll under norgesmeisterskapet i pløying.
Kjartan Skadsem vann klassa for teigplog i år som i fjor. Skadsem vann både stubb og vollpløying med klar margin. Han fekk dermed med seg både NM-tittel og kongepokal under konkurransen på heimebane.
Rasmus Mjølhus (t.v.) tok over som Norges representant i styret i International Ploughing organisation i 1997, etter Einar Moe. Moe sat i det internasjonale styret i 20 år. Under NM i pløying på Voll, tok han Bondevennen med på ein opplæringsrunde rundt på feltet.
- Dommarane har gitt deltakarane ei viss djupne for pløgsla. Det er viktig at konkurrentane held seg innafor desse måla, forklarte Moe.
- Opninga, eller den såkalla ryggen er viktig. Når konkurrentane har gjort seg ferdige med den, tek dei ein kort pause medan dommarane vurderer kvaliteten på opninga for kvar av konkurrentane. Opninga skal vera lukka og begge sider skal vera jamnt høge, seier Moe, og viser opninga til Skadsem .
Moe fortel at for å få til ei bein og jamnt brei avslutning, må deltakarana måla og justera seg inn heile tida undervegs. Kjem dei feil ut, er det ikkje rå å henta seg inn igjen mot slutten.
Etter finjusteringar er Skadsem klar for den siste runden. Plogskjæret må settast spist ned når plogen vert sett i jorda, for å få ei rett og markert linje i starten og avslutninga av teigen.
Kjartan Skadsem overlet ingenting til tilfeldighetane. Rutinert justerer han plogskjær opp og ned, inn og ut, alt etter kva han av erfaring meiner må vera rett for å få til den perfekte avslutninga.
Skadsem er klar for oppløpet og eit forventningsfult publikum ventar i motsatt ende av teigen. Dei veit at det skal noko til for at Skadsem skal mista den solide leiinga han har. Likevel litt det spenning i lufta.
Skadsem tek seg god tid og let seg ikkje stressa av situasjonen. Det står om eit norgesmeisterskap og ein eventuell kongepokal. I tillegg vert vinnaren i klassa kvalifisert for VM i Danmark til neste sommar.
Skadsem har fullført oppløpet, og avslutninga er snorbein. Publikum veit at det etter alt å dømma er årets norgesmeister som nettopp har avslutta konkurransen.
- Pløgsla skal vera jamn og fin. Om ein nyttar to- eller treskjærsplog, skal det ikkje syna på pløgsla. Teigen er 80 x 20 meter og konkurrentane har to timar og førti minutt til å gjera seg ferdige. Bruker dei lenger tid vert dei straffa med trekk i poengsummen.
Dommarane går nøye til verks og gjer poeng etter ulike kriterier på pløgsla. Opninga skal vera lukka og jamn. Heile feltet skal vera svart, utan at det stikk opp ugras. - Her er mange flinke deltakarar. Likevel litt ujamn kvalitet, spesielt i vollpløying, sa dommarane.
Det var ikkje bare dommarane som var ute for å inspisere feltet. To assistentar fann ut at denne kanten var heilt perfekt til å vandra i.
Mats Didrik Rogstad (t.v.)deltok i NM for første gong. Kollega Martin Jensen Averstad, var for første gong kvalifisert i klassa vendeplog elite. Begge driv gard i Akershus fylke. Rogstad dyrkar korn medan Averstad har mjølk- og grasproduksjon i tillegg til korndyrking. – Det freistar til gjentaking, seier Martin. Han fortel at traktoren havarerte og måtte reparerast, dermed hadde han ikkje fått den oppkjøringa han hadde håpa på før meisterskapet.
Etter to vellukka konkurransedagar, var deltakarane og bygdefolket klar for festmiddag og premieutdeling. Festmiddagen markerte og eit 25 års jubileum sidan VM i pløying vart arrangert i same bygda.

Overlegen siger på heimebane

Kjartan Trane Skadsem vann NM tittel og kongepokal i klassa for teigplog. Skadsem hadde god margin ned til nummer to på lista.

– Ei god pløglse dannar grunnlaget for gode avlingar, sa norgesmeisteren, som vann konkurransen for andre året på rad.

Skadsem har detatt i NM ti gonger dei siste tolv åra, og vunne fire gonger.I sommar deltok han på VM i Frankrike.

– Det vanvittig gode miljøet er ein av grunnane til at eg har halde på med konkurransepløying så lenge, uttaler Skadsem.

Vinnaren av klassa for teigplog og klassa for vendeplog, elite, kvalifiserer seg direkte til VM som skal arrangerast i Danmark neste sommar.

I klassa for vendeplog elite var det Harald Bøhsdalen som vart kåra som Norgesmeister, også han for andre året på rad. I vendeplog standard var det Henry Eskeland som gjekk sigrande ut av konkurransen.

– Pløying er presisjonsarbeid, sa Einar Moe. Moe har vore engasjert i miljøet rundt konkurransepløying dei siste 40 åra.

Han forklarer detaljer:

• Pløgsla skal vera jamn og fin.
• Pløgsla skal ha ei viss djupne, oppgitt av dommarane
• Opninga/ryggen skal vera flat, rett og lukka.
• Ugraskontroll; det skal ikkje stikka opp ugras verken i ryggen, i pløygsla elles eller i avslutninga.

Film fra lufta fra Norgesmeisterskap i pløying. Filmet med drone av Bjørn Georg Øie.

Del på Facebook

Stikkord denne saka: Maskin