Sårbar sentral: I kontrollrommet hjå FKRA på Kvalaberg blir alle prosessane i kraftfôrprosessen overvaka 24/7, året rundt. Og skjermane i rommet, så vel som industriprosessen avheng av straum, som i krisetilfelle kan falla bort. FOTO: FKRA

Samfunnskritisk – men øver ikkje på straumbrot

Kraftfôrfabrikken er ein av dei største i Europa, men vil ikkje kunne produsera ein pellet i fall langvarig straumbrot. Ei slik hending har FKRA førebels ikkje øvd på.

Bothild Å. Nordsletten

Felleskjøpet Rogaland Agder sin kraftfôrfabrikk rett sør for Stavanger sentrum er ein av Europas største. Her blir 20 prosent av alt kraftfôr i Noreg laga. Jæren og regionen rundt – nasjonens matfat – avheng av denne eine fabrikken for heile 70 prosent av sitt daglege dyrefôr. Kvar einaste dag køyrer opp til 70 vogntog «Med mat i tankene», FKRA sitt slagord, opp frå anlegget ved Gandsfjorden, og innover blant gardane.