Nei takk til ugras: Helga og Bernt Undheim på Buaskog har heldigvis lite lyssiv på eigedommen. Men anna ugras, som høymole og tistel får ikkje stå i fred. Helga sytar ikkje med å henga ryggsprøyta over ryggen. Blåfargen i sprøytevæska avslørar kor ho har vore og lettar arbeidet mykje, seier ho.

Ta knekken på lyssivet!

– Me har sett korleis bøndene i Austerrike og Sveits striglar kulturlandskapet. Eg kan ikkje skjøna anna enn at me bønder her til lands òg bør kunna greia det same, seier Helga Undheim.

Sjur Håland​

– Skjerpings, seier Helga, med glimt i augo.

Saman med mannen, Bernt Undheim, har dei kjøpt seg eit småbruk på Buaskog i Eigersund kommune. Her flytte dei etter at dei trappa ned omfattande gardsdrift og selde garden på Vigrestad i Hå i 2024. Det betyr i teorien at dei skal trappa ned aktivitetsnivået. Men med sauene som var med på flyttelasset og ein eigedom som skal stellast og passast på, er dei to langt frå arbeidsledige.