Oooh, vi vandrar saman, syng Olav Stedje i songen med same namn. Og slik vil nok også Jæren Friluftsråd at det helst skal bli, der dei i spissen for ei rekke offentlege instansar og reiselivsaktørar no planlegg den ti mil lange Kyststi Jæren, frå Tungenes i nord til Egersund i sør. Spørsmålet er berre om dei 400 grunneigarane, slik refrenget går, følgjer med på turen?



– Stor skepsis. Og stor velvilje. Grunneigarane er 400 ulike folk.

Slik oppsummerer Jon Tore Refve stemninga blant bøndene langs den stipla linja på kartet. Refve driv gard ikkje langt frå den planlagde traséen, er leiar i Bore Bondelag i Klepp, og, som styremedlem i Rogaland Bondelag, fylkeslaget sin representant inn i ei samarbeidsgruppe som er sett ned for arbeidet med kyststien.