Matberedskap fenger: Tysdag, over fem timar på Park Hotel Vossevangen, fekk 700 vestlendingar frå Voss og oppland ei grundig innføring i (mangelfull) matberedskap, sjølvforsyning og behovet for ei bondeinntekt som lokkar ungdomen til å bli matprodusentar. Sp-nestor Per Olav Lundteigen var klokkeklår på behovet for «ærlege tal» som grunnlag for bondeinntekta. Talgrunnlaget skal snart debatterast i Stortinget.

Matberedskap fenger: Tysdag, over fem timar på Park Hotel Vossevangen, fekk 700 vestlendingar frå Voss og oppland ei grundig innføring i (mangelfull) matberedskap, sjølvforsyning og behovet for ei bondeinntekt som lokkar ungdomen til å bli matprodusentar. Sp-nestor Per Olav Lundteigen var klokkeklår på behovet for «ærlege tal» som grunnlag for bondeinntekta. Talgrunnlaget skal snart debatterast i Stortinget.

Tverrpolitisk støtte til ‘ærlege tal’

22. januar 2025 | Aktuelt

Bondeårsverket ned i 1700 timar. Inga normering. Avkasting på all eigenkapital. På Voss seier alle politiske parti ja til å jobba for bondeorganisasjonane sine krav.

Bothild Å. Nordsletten

– Eg fekk ein telefon frå Vedum her i pausen, seier Per Olav Lundteigen, Sp-nestor og stortingsmann.

– Han lurte på om eg var i Davos. Eg svarte: Nei, Voss!

Per Olav Lundteigen

Per Olav Lundteigen

700 vestlendingar bryt ut i latter over innblikket i dei partitopp-interne forviklingane. For dette er altså ikkje Davos, den sveitsiske alpelandsbyen der verdas mektigaste samlast til Verdas Økonomiske Forum. Dette er eit snødekt Voss 21. januar, i rammen sett av folkerørsla Mening, mat og mot – ein landsomfattande møteserie om og for auka matberedskap og levande bygder.

Møtet på Voss er det 14. sidan det første Mening, mat og mot-møtet gjekk av stabelen for eit drygt år sidan i Grong i Trøndelag. Grong er heimbygda til initiativtakar Edel Urstad, som er utdanna i internasjonal matsikkerheit ved Universitetet på Ås, og klesdesignar.

Opplading til stortingsdebatt

Lundteigen er ellers ikkje på scena her for å driva stand-up. Han er her for å formidla alvoret som kviler over norsk jordbruk og matberedskap. Han vil mobilisera folkeleg støtte til kravet om «ærlege tal» som grunnlag for utrekninga av bøndene si inntekt. For utan ærlege tal og skikkeleg bondeinntekt – ingen matberedskap, er bodskapen.

Og ærlege tal, meiner Lundteigen, kjem ikkje minst ved å sikra at eit bondeårsverk blir rekna ned til 1700 timar, inga normering, og ved å syta for avkasting på all eigenkapital.

Saka om nytt talgrunnlag skal opp att i Stortinget i februar. Det skjer etter at Lundteigen sjølv, sist juni, stemte imot eige parti og fekk sikra ein ny runde. Igjen skal altså framlegget i Stortingsmelding 11 om 1750 timars bondeårsverk, 20 prosent normering og inga avkasting på eigenkapitalen opp til debatt.

Utfallet av den komande stortingshandsaminga vil ha noko å seia for det komande jordbruksoppgjeret – og for stortingsvalet til hausten. Forventingane og spenninga er der etter. Det er nå det gjeld for det som skal vera ei landbruksvenleg Ap/Sp-regjering.

Lundteigen manar faglaga til å tora å sei ifrå. Dei kan ikkje berre visa til primærstandpunkta sine, for så å lata vera å argumentera for krava sine – og så forventa resultat, insisterer Sp-veteranen.

Om regjering og storting ikkje greier å innfri krava – krav som også Bondelaget og Bonde- og Småbrukarlaget hevdar er sine – er konsekvensen ganske gitt, i følgje Lundteigen:

Regjeringa tapar valet.

Stemninga og klappsalvane i salen vitnar om at bodskapen går heim.

Primus motor: Edel Urstad skipa det første Mening, mat og mot-møtet om og for auka matberedskap og for levedyktige distrikt for 13 månadar sidan. Møtet på Voss er det 14 i rekka. Underhaug AS, Reime & Co AS samt Landbrukets Økoløft er møteseriens sentrale sponsorar.

Primus motor: Edel Urstad skipa det første Mening, mat og mot-møtet om og for auka matberedskap og for levedyktige distrikt for 13 månadar sidan. Møtet på Voss er det 14 i rekka. Underhaug AS, Reime & Co AS samt Landbrukets Økoløft er møteseriens sentrale sponsorar.

Pri nr. 1

Berre eit mindretal av dei 700 frammøtte på Vossevangen er bønder. Dei fleste er alt anna, men dei er opptatt av matberedskap. Målet til initiativtakar Edel Urstad er då også å samla folk og å bygga kunnskap. Ho er ikkje nøgd med den norske matberedskapen – som er grunnlaget for all anna beredskap, som ho seier. Mat og vatn bør vera prioritet nr. 1 for styresmaktene og folk flest, meiner ho. Her er sjølv ikkje den ferske totalberedskapsmeldinga tydeleg nok, ifølgje Urstad.

I løpet av kvelden går dei lokale arrangørane føre med eit godt døme og syt for at eit korps av frivillige trakterer møtelyden med salt betasuppe, kaffi og heimelaga kaker.

Med seg på scena for å formidla kunnskap om den låge norske sjølvforsyningsgraden og korleis ein kan auka den, er siviløkonom og daglegvarebransje-kritikar Anders Nordstad. Bonde Kjersti R. Omsted. Pallekarmdyrkar og forfattar Maria Berg Hestad. Sjefen i Voss Sparebank Jørund Rong. Bondeopprørar, talknusar og 2.vara til styret i Noregs Bondelag Sven-Martin Håland. 16-år gamle Frida Haltli som håpar å kunne driva gard. Og, altså, Per Olav Lundteigen.

Vil endring: Alle som tok ordet frå scena på folkemøte på eit brett. Frå venstre: Stortingsrepresentant frå Sp Per Olav Lundteigen, pallekarmdyrkar og forfattar Maria Berg Hestad, bonde Kjersti R. Omsted, siviløkonom og daglegvarebransje-kritikar Anders Nordstad, bondespire Frida Haltli, initiativtakar til Mening, mat og mot Edel Urstad, bondeopprørar og 2.vara til styret i Bondelaget Sven-Martin Håland, sjef i Voss Sparebank Jørund Rong. Dei to lokale møtearrangørane til slutt: Nils Martin Seim og Hilde Lussan Selheim.

Vil endring: Alle som tok ordet frå scena på folkemøte på eit brett. Frå venstre: Stortingsrepresentant frå Sp Per Olav Lundteigen, pallekarmdyrkar og forfattar Maria Berg Hestad, bonde Kjersti R. Omsted, siviløkonom og daglegvarebransje-kritikar Anders Nordstad, bondespire Frida Haltli, initiativtakar til Mening, mat og mot Edel Urstad, bondeopprørar og 2.vara til styret i Bondelaget Sven-Martin Håland, sjef i Voss Sparebank Jørund Rong. Dei to lokale møtearrangørane til slutt: Nils Martin Seim og Hilde Lussan Selheim.

– Sjølvsagt å vera her

Når arrangementet har kunna bli såpass svært skuldast det støtte frå 44 lokale organisasjonar og 42 sponsorar. Dei spenner frå bygdekvinnelag, ungdomslag, småbrukarlag og somme lokale bondelag, via Sau og Geit, 4H og skytterlag, til maskinbedrifter, Tine og Nortura. Ingen av dei harde å be, ifølgje dei to som tok initiativet til mønstringa, Hilde Lussan Selheim og Nils Martin Seim. Både er bønder og medlemmar i Bonde- og Småbrukarlaget, men seier dei skipar stormøtet som privatpersonar.

Men går opplegget heim også hjå dei med formell makt i lokalsamfunnet? Jaudå, samtlige lokale parti sa ja til å støtte dei, forsikrar arrangørane. Også Sp og Krf frå nabokommunen Vaksdal har hive seg med.

«Det er sjølvsagt at me skulle vera med her. Eg er interessert i mat og beredskap. Det trur eg alle er.»

Svein Erik Burud, Voss Høgre

Heradsstyrerepresentant (tilsvarande kommunestyrerep., journ.meld.) frå Voss Høgre, Svein Erik Burud, har med seg ei lita bok og noterer flittig gjennom kvelden.

– Det er sjølvsagt at me skulle vera med her. Eg er interessert i mat og beredskap. Det trur eg alle er. Eg har bakgrunn frå forsvaret og har jobba mykje med totalberedskap, men har knapt høyrt uttrykket sidan 80-talet. Men sjå nå, korleis verda har blitt.

Høgre-politikaren trur møte som dette bidreg til bevisstgjering om heile matsystemet.

– I kva grad vil dette medvitet vare ved inn i regjering, dersom Høgre vinn valet til hausten?

– Uansett må me ta det på alvor, seier Burud.

Han legg til:

– Men så trur eg det trengst vaksenopplæring av politikarar lokalt, for dette er kompliserte greier.

– Med det du nå veit om norsk matberedskap, vil Voss Høgre til dømes gå inn for nedbygging av matjord?

– Eg trur ikkje det kjem til å bli bygd ned meir matjord på Voss, nei, svarer Burud.

Tverrpolitisk: Alle partia i Voss heradsstyre - H, Sp, Krf, V, INP, KrF, Frp, Mdg, Ap, SV og R - stilte opp på stormøte. Samt Krf og Sp frå nabokommunen Vaksdal. Ordførar i Voss, Tone Såkvitne (Sp) ytst til venstre. Høgre-representant Svein Erik Burud, i stripete skjorte, nr. fire frå høgre.

Tverrpolitisk: Alle partia i Voss heradsstyre – H, Sp, Krf, V, INP, KrF, Frp, Mdg, Ap, SV og R – stilte opp på stormøte. Samt Krf og Sp frå nabokommunen Vaksdal. Ordførar i Voss, Tone Såkvitne (Sp) ytst til venstre. Høgre-representant Svein Erik Burud, i stripete skjorte, nr. fire frå høgre.

Alle skal med

Initiativtakar Urstad utnyttar koket i salen til å be dei politiske partia koma på scenen. Opp kjem representantane for Voss H, Sp, Krf, V, INP, KrF, Frp, Mdg, Ap, SV og R.

«Då seier eg som i Kompani Lauritzen: Iverksett! Saman kan me flytta fjell.»

Edel Urstad, initiativtakar til Mening, mat og mot.

– Vil de jobbe for å støtta krava våre, ja eller nei, byr Urstad.

Ho meiner «ærlege tal» og styrka matberedskap.

Kroppsspråket til enkelte avslører ei viss kjensle av å vera litt «shanghaia». Dette stod ikkje på programmet. Men alle svarar dei «ja», eller med andre ord stadfestande på utfordringa.

– Eg vil snakka direkte til Ulstein, legg lokallagsleiar i Krf, Øystein Måkestad til, med referanse til Dag-Inge Ulstein som førstkomande laurdag skal veljast til ny partileiar.
Møteleiar Urstad er nøgd med svara og byr på ein referanse til eit TV2-program.

– Då seier eg som i Kompani Lauritzen: Iverksett! Saman kan me flytta fjell.

Salen applauderer.

Sp-representant frå nabokommunen Vaksdal, Sigmund Simmenes, heller samstundes litt venlegsinna kaldvatn over entusiasmen:

– Det er lett å vera her inne og vera hjartans einige. Men dette er berre indremedisin, om me ikkje går ut i verda og forkynner bodskapen.

Trur det nyttar

Stor dugnadsinnsats, massivt oppmøte, felespel og korsong, mat, drøs og politikk, javel. Men fører eigentleg slike folkemøte til endring?

– Ja, det har effekt, seier Edel Urstad.

– Men kor ligg makta i eit gildt folkemøte?

– I folket, vel! I kveld fekk me alle partia til å seia at dei vil bruka påverknadskrafta si oppover i eigne system, for våre krav. Då bygger me folkemakt. Dette er det nærmaste me har kome å setja trykk rundt vår politiske bodskap. Det er heilt fantastisk. Så håpar eg representantane er såpass rakrygga at dei faktisk gjer noko med det.

«Viss ikkje dette har politisk effekt,
kva har det då?»

Hilde Lussan Selheim, bonde, politikar og møte-arrangør

Også dei to lokale eldsjelene som tromma det heile i hop trur kvelden får konsekvensar. Hilde Lussan Selheim, som i tillegg til å vera bonde også sit i heradsstyre for Sp, seier det gir eit veldig løft å gjera ting saman.

– Når du får så mange ressurspersonar på scena, skal det noko til ikkje å bli litt kveikt. Det var kjempebra at alle partia var med og støtta. Viss ikkje dette har politisk effekt, kva har då det?
Arrangør-makker Nils Martin Seim, som i tillegg til garden driv eiga bedrift for, som han seier, å finansiera matproduksjonen, har tru på at slike møte betyr noko.

– Eg hadde aldri gjort dette om eg ikkje hadde tru på at det har ein effekt på å få ærlege tal. Eit folkemøte aleine er ikkje nok, men mange folkemøte er betre enn eit for å få kunnskap ut og få folk til å stilla spørsmål. Og breidda me har klart å engasjera i grasrota og blant politikarane, manglar sidestykke.
Men det er ein «vanvitig jobb», vedgår han. I følgje Hilde har Nils Martin tatt minst 300 telefonar for å ordna møtet. Han seier han føler at han har gjort det han kan. Men ennå er han ikkje heilt ferdig.

– Nå, etter at eit samla heradsstyre på Voss har sagt at dei støttar oss og vil ta saka oppover i eigne parti, vil eg jobba for at heradsstyret kjem med ei uttaling om kva som konkret må til for å sikra ei framtid for landbruket: Ærlege tal. Eit årsverk på 1700 timar. Inga normering. Og avkasting på eigenkapitalen.
Og Sp-veteran Lundteigen, han som har vore med på oppturar, men kanskje fleire nedturar for landbruket, trur han dette nyttar? Jaudå.

– Når eg ser denne forsamlinga gir det meg von og respekt, seier han, malmfullt, til dei 700.

– Når me er så mange her, er det fordi me kjenner på utryggleik. Mening, mat og mot gir von om forandring.

Samstemt: - Matberedskap og vatn er pri nr. 1, ropar Edel Urstad og får møtelyden taktfast med seg.

Samstemt: – Matberedskap og vatn er pri nr. 1, ropar Edel Urstad og får møtelyden taktfast med seg.