Ny uvisse: Bovaer utfordrar ei djupt rotfesta oppfatning av kva norsk mat skal vere – nemleg rein. Ikkje nødvendigvis fordi stoffet kan påvisast i mjølka, men fordi det i det heile vert gitt til dyra, skriv forfattaren. Foto: Istock / Jay Yuno

Bovaer: Om risiko og tillit i norsk jordbruk

Motstanden mot metanhemmaren Bovaer må forståast i lys av jordbruket si særstilling som både kulturelt, politisk og økonomisk felt.

Bjørn Egil Flø er bygdesosiolog og forskar ved Norsk institutt for bioøkonomi.
Han er sunnmøring og opplært til å meine at skal ting bli betre, lyt me gjere det sjølve.

Debatten om fôrtilsetjingsstoffet Bovaer har vore høgrøysta det siste året. Nokon har sett verdskonspirasjonar i mjølkeglaset, andre har svara med å stable vitskaplege rapportar i høgda og erklært at det var prov nok til å avslutte saka. Mellom desse to posisjonane – mellom kjellarmenneskja sine konspirasjonsteoriar og dei skråsikre ekspertane som tviheld på naturvitskapleg fakta – har det vore vanskeleg å føre ei samtale om det eigentlege spørsmålet: Kvifor vekkjer ein teknologisk klimafiks så sterk motstand i eit jordbruk som elles seier seg villig til å ta klimaansvar?