Avstand: Leigeavtalar skal føre til «driftsmessig god løysing». Her spelar avstand og vegstandard mellom leigejord og leigetakar inn, skriv artikkelforfattaren. Foto: Sjur Håland

Erfaringar frå landbruksforvaltninga

Landbrukskontoret i Time kommune har siste året arbeidd med oppfylging av driveplikt av jordbruksareal hjå jordeigarar, og med å få i stand jordleigeavtalar i tråd med jordlova sine krav.

Torfinn Nærland, Fagleiar landbruk, Time kommune

Kommunane har to sjekkpunkt for oppfylging av driveplikt av jordbruksareal – eitt år etter overtaking av landbrukseigedom og ved utløp av 10-årig avtale. Samt løpande observasjonar når me er ute på bygda. På Jæren er nok oppfatninga at jorda er i drift uansett. Dette har i lang tid ført til lite fokus på å krevje 10-årig uoppseieleg leigeavtale, sjølv med 40-50 prosent leigejord i kommunane. Men jordlova sitt krav til uoppseieleg 10-årig avtale er viktig ut frå fleire omsyn. Å sikre den aktive bonden føreseielege leigeforhold er etter vår vurdering noko av det viktigaste. Då kjem god utnytting av jorda, mattryggleik, høge avlingar, nye investeringar hjå eigaren med meir som naturleg konsekvens.