Endring: Sven Martin Håland meiner norsk landbruk er på veg mot ei systemendring i kjølvatnet av Bondeopprøret.

Kjempar for systemendring

Sven Martin Håland har blitt ein del av landbrukshistoria. Bondeopprøret har røska opp etablerte sanningar om bøndene si inntektsberekning med rota og talt makta midt i mot.


Sjur Håland


Mediemerksemda og støtta til opprørarane, også frå uventa hald, har vore overveldande. Nå tar Bondeopprøret landbruket sin inntektskamp inn i valkampen.


– Men eg må ha mat først. Etter påfyll av næring tenkjer eg klarare. Då er det lettare å vera analytisk og ha tankerekka med seg, seier Håland, og legg eit godt lag med smør og syltetøy på grovbrødskivene.

58.129 signaturar

Næring kan trengast. Håland har hatt ei våronn utan sidestykke. Saman med fire andre bønder står han bak Bondeopprøret. Sidan februar har 58.129 personar frå heile landet signert oppropet. Telefonen og datamaskinen til den travle bonden har vore i konstant bruk. I løpet av tre månadar har Bondeopprøret snudd opp ned på det meste av etablissementet kring jordbruksoppgjeret.