Heile familien: På Ombo-garden er heile familien i sving. Frå venstre: Rune, Ann-Mari, Leah Sofie, William, Per Kristian og Kenneth.

Draumen om Ombo

Ann-Mari Lindanger er ein av to mjølkebønder som er att på øya Ombo i Rogaland. No drøymer ho og familien om fjøs med robot.


Jane Brit Sande


– Garden og bondeyrket har alltid vore planen min. Eg passar ikkje på eit kontor, eg trivst best når eg jobbar med dyra, seier Ann-Mari.


Saman med mannen, Kenneth Rød, driv Ann-Mari Lindanger gard med mjølk og egg på Ombo i Rogaland. Ann-Mari har vore aktiv i drifta på heimegarden sidan ho kom heim frå vidaregåande i 2001. Då kunne ho skilte med fagutdanning som agronom frå KVS-Lyngdal. Ho dreiv garden saman med far sin, som også eigde den. Saman med faren bygde ho hønsehus, og starta opp med eggeproduksjon i frittgåande system. Ann-Mari var tilsett på garden, medan faren var i arbeid utanom garden. Mjølkekvota er på 250 tonn. Ved inngangen til 2020, tok ho endeleg over garden.


– Når eg ser tilbake på korleis åra har vore, er eg eigentleg glad for at eg i så mange år var tilsett på garden med dei rettane som følgjer med. Eg har fått born og vore gjennom eit samlivsbrot, og då har denne ordninga vore best, seier Ann-Mari.


Ann-Mari har sønene Per Kristian, Rune og William. I 2013 kom Kenneth inn i livet hennar. I 2015 fekk dei Leah Sofie, og i 2016 gifta dei seg.

Drøymer om fleksibilitet

No er draumen å bygga om og bygga på eksisterande fjøs.


– Med mjølkerobot, og plass til alt av storfe som høyrer til garden. I tillegg til kyrne i fjøset her heime, har me 40 ungdyr i eit fjøs me leiger. Det er dyr alle vegar, seier Ann-Mari.