Lausdrift på lista: Anthony Vassbø med delar av driftsbygning bak seg. Auka fleksibilitet gjennom ombygging av båsfjøset til lausdrift med robot står høgt på ønskjelista til bonden.

Ein kløppar av ein klippar

23 år gammal har Anthony Vassbø kjøpt gard med mjølkekyr, gris og 200 vinterfôra sauer i Ørsdalen. I tillegg klipper han sau, og nå ventar NM på heimebane.

Sjur Håland​

Det blir sagt at Ørsdalen i Bjerkreim ikkje er grøn. Ser du dalen i fugleperspektiv, er han kvit. Av sauer.

– Det må i så fall vera når sauene ikkje er på heia. Om sommaren er dalen grøn, seier Anthony Vassbø.

Bonden held på med vask av sauehuset når Bondevennen kjem innom som snarast. Klargjering til ny innefôringssesong, med andre ord.

– Sauehuset har vore nytta til slaktegris, seier han.

Etter møtet med sauemøkka på asfalten over fjellet vurderer eg å be han vaska hjulbogane, men let det høfleg vera. Bilen har godt av litt impregnering.