Hausteveteran: Fire eller fem maskinar er slitne ut i løpet av dei 60 åra Jørgen Hammersland har hausta vinterfôret på garden. Bonden sjølv er ikkje utsliten. 89-åringen vil fôrhausta så lenge helsa held.

Har fôrhausta i 60 år

Heilt sidan 1962 har bonden køyrt traktor og fôrhaustar i siloslåtten på garden. Kanskje har 89-åringen Jørgen Hammersland den uoffisielle verdsrekorden i fôrhausting.


Sjur Håland


Den 60. sesongen er ikkje noko unnatak. Når Bondevennen er på besøk på Eikeland i Etne, er førsteslåtten unnagjort, medan grasattlegga med havre til grønfôr står for tur. Så er det andreslåtten litt seinare på sommaren. Det går slag i slag. Den grøne og gule fôrhaustaren står klar. Det same gjer John Deer’en og tre avlessarvogner. Og Jørgen.

Handlag

Det er råd å rekka over mykje på 89 aktive år. Jørgen, som har handlag med det meste, har mellom mykje anna bygd kårbustaden sjølv. Med material frå skog som han sjølv i si tid planta. Han er interessert i alt som sviv, og var mellom anna den første i bygda som tok i bruk ein hydraulisk vedkløyvar – litt av ein revolusjon i si tid.
Jørgen har vore gift med jenta frå nabogarden, Reidun, i 54 år. Garden er det sonen deira, Ingvar, som driv, medan dei to døtrene er busette på gardsbruk eit stykke unna, i Haltdalen og Hallingdal.