Ivrig smågris: Smågris verdset jamn tilføring av leikemateriale i bingen. Finkutta halm gjer nytta, og gris kan leike slik griser likar å leike.

Stålkontroll i smågrisavdelinga

Den årlege statistikken frå Ingris og Animalia viser fleire lokale namn på lista over dei ti beste svinebesetningane i landet, for 2025. Sjur Aakra og Håkon Friestad er blant dei beste i landet på smågris. Kva skal til for å oppnå slike resultat?

Hilde Elin Østerhus​

På Jæren driv Håkon Friestad smågrisproduksjon med konvensjonell helsestatus, i leigd grishus på Haugland i Orre. Dei siste åtte åra har namnet hans stått på lista over beste produksjonsresultat i smågrisavdelinga.

Smågrisene på Haugland blir gitt optimale høve til å gjere den jobben dei er sette til; å vekse raskast mogleg med minst mogleg bruk av kraftfôr og sjukdom undervegs. Her veks dei 714 gram til dagen, og brukar 1,51 fôreiningar per kilo tilvekst mellom 10,2 kilo inn i avdelinga, og 34 kilo vekt når dei reiser vidare til slaktegrisprodusenten. Han tapar minimale 0,1 prosent av smågrisen frå avvenning til sal.