Skadeverknad av hjortebeiting i eng

Vill, vakker og vanskeleg: Bondens enger og innmarksbeite er fristande for hjorten når beitekvaliteten i utmarka vert for låg. Foto: Johan Trygve Solheim, Norsk Hjortesenter


Avlingstapet av hjortebeiting i eng er ofte størst i område med lite snø, og med ung vintergrøn eng som er i god hevd. Elles varierer avlingstapet med bestandstettleik av hjort, engalder, timotei-innhald og korleis enga ligg i høve til skog og utmark.


Samson Øpstad og Pål Torvaldsen, NIBIO og Arve Arstein, NLR Vest


Hjorteforvaltinga var alt i 2009 på etterskot med å stansa veksten i bestanden i område med stor tettleik, i følgje Overvåkingsprogrammet for hjortevilt. Konsekvensane ser ein som utfordringar eller konfliktar med andre samfunnsinteresser; omfattande beiteskade på innmark og skog, og høgt tal trafikkpåkøyrsler. Ei anna utfordring av sterkt auka hjortebestand er nedgang i kondisjonstilstanden til hjort, registrert som nedgang i slaktevekter for kalv og ungdyr med grunnlag i tettleiksavhengige faktorar.