Ekte vare: Bjarte Kydland har serva bønder og andre kundar hjå BondeKompaniet med høvelspon og alt mogleg anna på Varhaug sidan 2007. – Me legg vinn på å vera dei me er. Her er det ekte. Ikkje noko tilgjort, seier butikksjefen.


FKRA 125 ÅR:

– Fantastisk meiningsfylt

Betyr 125-åringen Felleskjøpet Rogaland Agder meir enn å «berre» vera ein stabil leverandør av kraftfôr, gjødsel og såvarer? Bondevennen har sjekka med BondeKompaniet på Varhaug.


Sjur Håland​



– An Bjarte æ på kontoret, seier ein av ekspeditørane på breitt Varhaug-mål og peikar på ei dørglipe i hylleveggen mellom sagkjedeoljer og insektmiddel.

Bondevennen er innom BondeKompaniet på Varhaug ein ualminneleg alminneleg gråversmåndag i november. Ein handfull bilar står travelt parkert på asfalten utafor butikkdøra. Ei kvinne står og lempar tennbrikettar, spylervæske og to gule sekker med hønefôr inn i bagas­je­rommet på bilen sin.