Åtvarar mot volumprodusentane sine gardsmeieri

Ropar varsku: Mjølkeprodusent og rådsmedlem i Tine, Rolf-Daniel Midtun, her med minstemann Fride på halvanna år, er uroa for samvirket si framtid når stadig fleire mjølkebønder satsar på eige gardsmeieri. Foto: Privat


Når volumprodusentar i sentrale strok etablerer gardsmeieri, ringer alarmbjøllene i fjøset til Rolf-Daniel Midtun. Han fryktar eit svekka Tine og eit landbruk på veg tilbake til 1920.


Sjur Håland


– Volumprodusentane går inn i eit terreng som dei små nisjeprodusentane har skapt. Dei nyttar seg også av salskanalane som dei har etablert. No vil også bønder med store mjølkekvotar ta ut meirpris i denne marknaden. Det er skummelt, seier Midtun.

Bestemor får konkurranse

I Eivindvik i Gulen kommune i Vestland driv Midtun med mjølkeproduksjon med kvote på vel 300.000 liter. Til produksjonen på garden høyrer også kjøtproduksjon med eige påsett og innkjøpte oksekalvar i tillegg. Vinterstid har han også nok av arbeid i eigen skog. Mjølka leverer bonden til Tine sitt anlegg på Byrkjelo, kor det blir produsert Norvegia-ost i store mengder til forbrukarar i heile landet.


Små nisjeprodusentar av ost er også ein del av mangfaldet i det norske matproduksjonslandskapet, understrekar bonden.