Dei finn verdien på eigedomen din

Takst: Martin S. Håland t.v. og Asbjørn Tjellesvik er sertifiserte takstmenn med spesialkompetanse på gardsbruk. Dei driv begge frittståande verksemder, men er knytt til den nye organisasjonen Norsk Landbrukstakst.


Før eller seinare vil det oppstå eit behov for ein landbrukstakst på eigedommen din. Landbruket har eigne takstfolk til slikt arbeid.


Sjur Håland


Organisasjonen Norsk Landbrukstakst, som vart stifta i 2018, skal bidra til auka landbruksfagleg kompetanse, felles forståing mellom dei sjølvstendige takstfolka og rettast mogleg verdisetjing.
Asbjørn Tjellesvik er tidlegare bonde og rekneskapsførar. No driv han Agro Takst AS med base på Moi i Lund, saman med landbrukstakstmann, byggmester og tidligare bonde, Bernt Terje Høyland, frå Ualand i Lund. Martin S. Håland, frå Sandnes, har også gått vegen frå bondeyrket til sertifisert takstmann med spesialkompetanse på landbruk. Hovudfeltet deira er Sør-Rogaland, medan to kollegar i Vest-Agder dekker nabofylket i sør.

Storveges

Landbruket har ikkje vore så høgt prioritert innan takseringsmiljøet.


– Difor var det storveges då Norsk Landbrukstakst vart etablert. Me treng å samla uavhengige og sjølvstendige takstfolk under felles paraply, spissa og bygga kompetansen me alt har vidare for å gjera ein best mogleg jobb ute på gardsbruka, fastslår Håland.