Mjukt mot hardt: Tusentals bønder skadar seg på jobb kvart år. Frå «berre» eit kutt i handa, eller ei blå tå, til langt meir alvorlege hendingar. Berre å akseptera? Foto: Istock / Dusan Stankovic

Det livsviktige, livsfarlege yrket

Landbruket er i toppsjiktet når det gjeld ulukker på arbeidsplassen. Det er det mange grunnar til, men rapportar viser at bonden sjølv langt på veg er sin eigen verste fiende.

Hildegunn Mugås, veterinær og skribent.

Årleg mister norske bønder i snitt fem kollegaer. Det viser tal frå Arbeidstilsynet. Bøndene døyr på jobb; i fjøset, i traktoren, i møkkakjellaren.

Det er lett å seie at fem er fem for mykje, men nokon må handle. Og nokon – ja, det er oss bønder sjølve. Det er me som må tenkja og gjennomføra sikkerheit. Alltid. Kvar gong, kvart lass, kvar onn.