Krig rundt tunet: 25.mai i år fanga kameraet på storbruket Vоladar det russiske rakettåtaket mot ein fabrikk mindre enn ein kilometer vekke. Stillbilete frå video/ Bohdan Hromyk.

– Me ser på oss sjølve som forsvarar

Dei driv jorda og fjøsa med russiske dronar susande over himmelen. Ukrainske bønder har noko å læra norske kollegaer og byråkratar om beredskap.

Bothild Å. Nordsletten

Ute på plenen til Bryne Kro & Motell spelar ein gjeng unge jærbuar minigolf. På innsida, på andre sida av glasdørene, står Ruslan Maksymiv og held opp telefonen sin. Framfor han rettar landbruksdirektøren i Rogaland, ordførarar, kommunedirektørar, jordbrukssjefar og fylkesleiaren i Bondelaget blikket mot skjermen hans. Signalraude- og gule meldingar varslar om ulik grad av fare heime i Zboryv kommune, kor 37-åringen er ordførar.