Saman i væta

Alpetraktoren: Har denne ei framtid i bratte bakkar på vestlandet?


Tvillinghjul, breiare dekk, mindre marktrykk og lettare utstyr. Det er kva vestlandsbonden spør etter når den blautaste sommaren i manns minne snart er historie.


Liv Kristin Sola, frilansjournalist


– Sesongen har vore utruleg utfordrande for bøndene her i vest. Og det vil bli tøft også i mot vinteren når fôrproblematikken slår inn for fullt, med lite avling av dårleg kvalitet. I tillegg ser me mykje køyreskadar, seier Roy Solberg.


Han representerer Solberg Mekaniske Verkstad, som ei helg i august inviterte bønder og bygdefolk til to opne dagar heime på Solberg på Osterøy i Nordhordland. Med seg på laget hadde dei blant anna Osterøy Sau og geit, Bondelaget og Bonde- og småbrukarlaget, samt Solbjørg Ungdomslag.