Løysningsorienterte sauebønder: (F.v.) Anthony Vassbø, Svend Georg Apeland, Kai Inge Skjæveland, Morten Bøe og Gaute Gjesdal.

Sauebønder tek snyltarkampen til eit nytt nivå

Med mikroskop som våpen, kjenner sauebønder i Bjerkreim og Helleland seg betre rusta i kampen mot innvolssnyltarane. Bøndene vil vite kven dei skal krige mot, og har derfor starta å telje egg i saueskit.

Hilde Elin Østerhus​

– Det var i fjor vinter at eg verkeleg forstod alvoret i den situasjonen me står i, og tenkte at eg måtte gjere noko, seier Gaute Gjesdal.

Han viser til den evigvarande stillingskrigen mellom sauebonden og innvolssnyltarane. Den usynlege sabotøren som lurar i beita, viser seg å vere svært tilpasningsdyktig. Når bønder og veterinærar finn ei behandling som løysing på snyltarproblemet, svarar innvolssnyltarane med å vere like løysingsorienterte,-dei tilpassar seg. Snyltarane endrar bitte litt på genetikken, slik at dei overlever og kan formeire seg vidare. Resistensutvikling er eit faktum, og mange bønder har no innvollssnyltarar i sine beiter, som ikkje let seg drepe.