Strid om gjerdeplikten

Påkøyrd av toget: Lars Madland synar dei brekte pålane i Bane NOR sitt gjerde. Ei nybær ku byksa gjennom gjerdet og opp på skinnegangen og vart ihelkøyrd av toget. Madland får ikkje erstatning, og gjerdet har ikkje blitt reparert.


Bane NOR vil ikkje lenger vedlikehalda gjerdene langs jernbanelina på eigedommen til Lars Madland og andre bønder som grensar til jernbanen. Det finn ikkje bonden seg i.


Sjur Håland


I september small det igjen. Ei nybær ku, tilhøyrande Lars Madland på garden Odland i Hå, kom seg gjennom gjerdet, der to pålar var knekte, og opp på skinnebanen. Her vart ho treft av toget. Sjølv var han i fjøset og la merke til at toget tuta. At noko hadde skjedd, fekk han beskjed om etter ein halvtime, då naboen ringde.


– Kua, med øyrenummer 1833, låg i deler langs banen. Hovudet ein plass, og føtene ein heilt annan plass, fortel han.

Snikoverfører ansvaret

Bonden har opplevd marerittet fleire gonger. Det er like tungt å sjå dei ihelkøyrde dyra kvar gong. Bane NOR har likevel alltid erstatta tapet av dyra, og dei har reparert gjerdet langs banen, når Madland har gitt beskjed om at noko har vore øydelagd.