Varslar ei ny tid for Småbrukarlaget

Lovar endring: Tor Jacob Solberg hausta ståande applaus då han entra talarstolen for første gong som leiar i Norsk Bonde- og Småbrukarlag. No skal han stå på for å endra jordbrukspolitikken, lovar han.
Foto: Nora May Engeseth/Norsk Bonde- og Småbrukarlag


– Eg har ein draum om å vere med og endre norsk matpolitikk, og dette vervet gjer det mogleg å vere med og påverke, seier Tor Jacob Solberg, ny leiar i Norsk Bonde- og Småbrukarlag.


Jane Brit Sande


Tor Jacob Solberg er bonde på Skiptvet i Viken, og driv med økologisk produksjon av mjølk, kjøt og korn. Dei aller fleste, om ikkje alle bønder, visste godt kven han var før han entra talarstolen, for første gong som leiar – til ståande applaus frå Landsmøtet i Norsk Bonde- og Småbrukarlag (NBS). I 2014 vart han Årets unge bonde, og i 2021 var han med og tok initiativ til Bondeopprøret.


– Du trekte deg frå Bondeopprøret då du vart lansert som leiarkandidat i NBS. Kvifor?


– Eg ønskte å senda eit tydeleg signal om at eg skal gjennomføra NBS sin politikk. Det er NBS som er oppdraget no, og derfor var det heilt naturleg at eg tredde til sides frå Bondeopprøret, seier Solberg til Bondevennen.