Engasjert med æresdiplom: Grunnlaget for engasjementet og alle verva handlar om å få noko til å skje. Bente Gro Milwertz Slettebø liker å vere del av noko som er større enn seg sjølv. I sommar fekk ho Norges Bygdeungdomslag sin æresdiplom, og vil alltid vere bygdeungdom i hjarte.

PORTRETT: BENTE GRO MILWERTZ SLETTEBØ​:

Bygdeungdom i hjarte

I spennet mellom gardsdrift og politikk let ho seg engasjere av det meste. Det heile sette fart i bygdeungdomslaget.

Jofrid Åsland Gilje

Bente Gro Milwertz Slettebø står i gardsrommet med ryggsekken på. Ho har tydelegvis bestemt seg for å trimme journalisten litt. Ferda går forbi det som skal bli nytt sauehus på garden, og ganske bratt oppover.

– Sjå der ja, den kviga skal ikkje vere her i utmarka.

Ho finn ein benk som dei ubodne kvigene har herja litt med. Benken kjem på plass, og ut av sekken; grønsaker frå eigen gard og leskande saft. Auga kviler godt i landskapet av åsar, fjelltoppar, beite og gardsbruk. Her oppe kan ho nesten skimte heimegarden, Hodlen på Laksesvela i Bjerkreim. Ein gard morfaren kjøpte i si tid. Foreldra overtok garden etter onkelen, som døydde i ei ulukke med traktor. Dei flytta frå Sandnes for å overta heimegarden til mora. Det var ein liten gard, men her kom både sauer og mjølkekyr på plass.