Ryggdekning: Thomas Hadland tar eitt steg fram og overtek ansvaret for navet i Brekkå Purkering. I ryggen har han frå venstre: Nortura-rådgivar Laura Lundgaard Jensen, far, Tommy Hadland, bondekollega og Nortura-tillitsvalt, Willy Finnbakk, og Nortura-rådgivar Eirik Håvarstein.

Thomas steller tusen purker

Thomas Hadland (21) er beinklar til å ta over styringa av Brekkå Purkering på Varhaug. Gjennom navet får den unge bonden ansvar for tusen årspurker som kvart år leverer 28.000 smågris til satellittane.


Sjur Håland


Thomas, og sambuar Tonje Lea Pollestad, kjem til dekka bord. Grisehusa på garden Brekkå er i tipp topp stand og oppgraderte etter dagens krav. Dei unge må likevel belaga seg på å arbeida for føda. Med dagens driftsomfang er det likevel mogleg å få alt gjort utan mykje leigd hjelp.


– Tonje har både arbeid og skule utanom, men er med på kveldstid. Me har nokre skuleungdommar som hjelper til annan kvar helg og to kveldar i veka. Elles greier me arbeidet sjølv, seier Thomas.