Forskar på rus i fjøset

Bruk/misbruk: Høgt arbeidspress, økonomiske problem og einsemd er berre nokre av grunnane til at somme bønder blir hekta på medikament, alkohol eller spel. Omfanget av misbruken skal no kartleggjast. Foto: Istock


– Bøndene har så mykje å gjere at nokre tyr til rusmiddel for å halde seg gåande, seier Aina Winsvold. No vil Ruralis-forskaren koma i kontakt med bønder som slit. Målet er å betra hjelpetilbodet.


Siv H. Undheim


– Bønder går under radaren når det gjeld rus og avhengigheit, seier Aina Winsvold, forskar ved Ruralis og leiar av prosjektet Rus og avhengigproblematikk i landbruket.


Kor mange bønder som drikk, brukar pillar eller på annan måte slit med avhengigheit, er ukjent, seier ho.


– Nei, det er det ingen som veit, for det har ikkje blitt undersøkt før. Me skal prøve å få eit bilete av omfanget. Delen er nok ikkje mindre enn i befolkninga generelt. Kanskje heller tvert imot.


Forskaren trur også det er ein del som bagatelliserer eller fornektar at dei har eit problem.