50 unge bønder i godt lag

Drøs for alle: Gaute Ødemotland slår av ein prat med oksen «Andreas».


Fjøsbesøk, grillmat, og drøs. Jæren Young Cowboys er glade for at pandemirestriksjonane er historie.


Jane Brit Sande


Jæren Young Cowboys (JYC) hadde ei etterlengta samling på Storevollen gard, på Voll i Klepp kommune, førre veke. To år med pandemi har satt kjeppar i hjula for den elles aktive gjengen med unge ku-bønder og andre ku-interesserte mellom 15-35 år. No var det dags for grillmat, fjøsbesøk, gildt lag og eit rekordkjapt årsmøte.


– Me har vore spente på korleis pandemien ville påverke oss, men det ser ut til å gå bra. Me har hatt éit arrangement i løpet av denne perioden, og det var tiårsjubileet i november i fjor. Då hadde me eit godt oppmøte med 80 personar. Det ligg an til å bli ganske godt i dag også, seier avtroppande styreleiar, Rasmus Pollestad, før møtet startar.