Auksjonarius: Åge Gyland leda auksjonen, og fekk selt alle 21 vêrane. Totalt fekk vêreringen inn 151 500 kroner på auksjonen. Ståle Haukelid viser fram vêren.

– Selt for 16 000 kroner!

Høg puls, hemmelege notat i auksjonskatalogen, og kaffi på kanna. På vêrauksjon for Ring 120, står gamle prisrekordar for fall.


Jane Brit Sande


Nerstøl travbane, Eiken, Agder: Eit knippe bønder og staselege vêrar er på plass i god tid. Tru kor mange som kjem i år, undrar arrangørane. Grillen er varm, kaffien på kanna likeså. I øskja ligg ein god bunke auksjonskatalogar med kåringsbevisa for dagens 21 vêrar. All naudsynt informasjon om diverse vitale mål er på plass. Vêrring 120 har invitert til vêrauksjon for kjøparar i Vest-Agder.