Fruktrekord i vest, tap i aust

Rekordar og tap: I vest bognar frukttrea, og det er venta ny eplerekord. I aust er historia ein annan. Omfattande frostskadar har tatt knekken på tusenvis av frukttre. Særleg epleproduksjonen er hardt råka. Illustrasjonsfoto: Liv Kristin Sola


Medan fruktprodusentane i vest siktar mot nye avlingsrekordar, opplever dyrkarane i aust store skadar etter vinterfrosten.


Jane Brit Sande


Bondevennen har snakka med fleire fruktpakkeri og fruktlager i Hardanger, Ryfylke og Telemark om stoda i fruktproduksjonen i år. I fjor var det skrint for fleire kulturar, då det kom frost i blomstringa og rognebærmøll gjorde stor skade på frukta. I år er stoda heilt annleis – i alle fall i vest.


– Det er utruleg kjekt at me får eit godt avlingsår like etter eit svært dårleg, seier Odd Åge Helvik, dagleg leiar i Hardanger Fjordfrukt SA, til Bondevennen.


– 2020 gav negativt resultat for Hardanger Fjordfrukt, for første gong. Det er godt å sjå pilene peike ein annan veg i år, seier han.


Verksemda har 170 produsentar, og forsyner marknaden med Hardangermorell, -eple, -plomme, og –pære.


– No er morellsesongen snart ferdig, og den har vore heilt fantastisk, seier Helvik.