God start på grønsakssesongen

Lovande knopp: Blomkåla til Jone Wiig kan sjå ut til å bli klare for hausting mot slutten av mai.


Grønsakene er i rute, og det blir meldt om jamn og god vekst. – Eit godt utgangspunkt for ei bra hausting, seier Kari Aarekol i NLR.


Jane Brit Sande


NLR Rogaland inviterte til si årlege markvandring for tidlege kålvekstar og salat, med grønsaksrådgivar Kari Aarekol i spissen. Kring 35 produsentar og representantar frå næringa møtte opp på Vik i Klepp 9. mai.

God effekt av duken

Første stopp er i eit brokkolifelt hjå Andreas Wiig. Han planta sorten Aquilles 28. mars, og solfangar vart bytta ut med fiberduk 25. april. Han har berre vatna ein gong, i den varme påskeveka.


– Brokkolien står usedvanleg jamt på mange felt, og har eit veldig godt utgangspunkt. Nokon felt er leveringsklare mot slutten av mai, konstaterer Aarekol.


– Det har vore mykje vind i det siste, men heldigvis har det også kome litt regn. Plantane i dei felta som ikkje har vore dekka av duk har fått juling av vind og sandflukt.