– Vi har alt å bidra med

Likestilling på alle plan: Anne Ims Langåsdalen meiner likestilling handlar om så mykje meir enn kvinner. – For å få til eit levande landbruk og levande bygder i framtida, må vi ha gode, tolerante miljø som folk kan trivast i og byggje seg eit livsverk i, seier 19-åringen. Foto Privat.


– Vi kvinner har store moglegheiter til å styre landbruket mot nye retningar, ikkje minst når det gjeld berekraft og levande bygder. Vi har alt å bidra med, seier Anne Ims Langåsdalen.


Liv Kristin Sola


19-åringen frå Hjartdal i Telemark var ei av ti unge kvinner som takka ja då Landbruks- og matminister Olaug Bollestad inviterte til nettmøte i forkant av Kvinnedagen 8. mars. Alle dei ti ungdommane er elevar ved ti av landets vidaregåande skular som tilbyr naturbruksutdanning.

Kvinner vil påverke landbruk

Tema for samtalen er utdanning og kvinner sin plass i landbruket. Bollestad vil bli utfordra på kva som skal til for at unge kvinner vil og tør å satse på næringa. Langåsdalen trur nettopp utdanning er ein nøkkelfaktor.


– Eg trur menn er flinkare til å kaste seg inn i ting og stole på seg sjølve. Vi kvinner tenker meir på konsekvensar og avgrensar oss sjølve. Vi må skaffe oss den kunnskapen vi treng for å gå inn og meine noko. Vi må stole på oss sjølve, seie ho.


Langåsdalen trur landbruket er i ei brytingstid. At kompetanse blir viktigare enn nokon gong for å lukkast som bonde. Ho trur det vil styrke kvinner sin posisjon, nettopp fordi dei er kunnskapssøkande og lite risikovillige.