Gjengen i havgapet

Familien Haarr: F.v. Alf Rune, Alf Magne, Silje og Simon. Fjøset har dei bygd på andre sida av vegen, nærare beitene, men i kort avstand frå huset og fôrsentralen, som dei har på den gamle låven.


Silje og Alf Magne Haarr vil ikkje bli større enn at dei har grep om drifta og kontroll på økonomien – og tid til kvarandre.


Liv Kristin Sola


Det bles godt, noko som ikkje er uvanleg her sør på Jæren. Godt over 20 grader gjer det likevel leveleg å sitte ute – i ly av ein gamal frukthage. Dei vårgrøne kjelvene speglar seg i sola og lokkar kyrne ut or fjøset. Kyrne vandrar på grusvegen mellom fjøset og beitene. Dei føretrekk beitet heilt ved sjøen, lengst vekk frå fjøset. Avstanden verkar ikkje til å bety noko.


– Det er eit høgdepunkt når me kan sleppe dyra ut om våren. Åtvaringane me fekk om redusert yting og mange «raude kyr», er ikkje eit problem så langt, seier Silje.