Sanert: Nyrenovert grisehus er klart til å takast i bruk att etter ein sanerings- og byggepause på eit halvt års tid. Laura Lundgaard Jensen frå Nortura og bonde Sjur Aakra har samarbeidd om mellom anna livdyrlogistikk og plan for SPF-sanering. Første smågrisene er planlagt levert i midten av desember.

Har rigga grisehuset for vidare drift

Sjur Aakra har tømt grisehuset for dyr, sanert og føreteke eit stort vedlikehaldsløft. Nå er han klar til å ta i mot nye purker.


Sjur Håland


Men aller først skal ei gruppe nyfikne svineprodusentar få innsyn i kva som er gjort, før anlegget blir desinfisert. Innsyn betyr også varm Nortura-grill med pølser og røykte kotelettar, rikelege mengder kaffi og marsipankake. Nett slik bøndene likar det best. Det er travelt å få alt i stand til rett tid. Rett før dei første kollegaene glir inn i tunet, kjem bonden, Sjur Aakra, småspringande gjennom tunet med ein drill i eine arbeidsneven.


– Me får snakkast seinare, nå må eg i dusjen først, seier han, og legg på sprang mot våningshuset.