Vakkert: Discovery er fotomodellen blant epla, vakkert å sjå på og knasande søtt og friskt.– Mitt favoritteple, seier fruktbonde Kari Lutro. Ho strekkjer seg etter å produsere det perfekte eplet.


I bakkar så bratte at «feiaren neppe har lov å gå der», haustar Kari Lutro 45 tonn epler, 7-8 tonn plommer og ein heil del pærer. Dei 13.000 frukttrea gjev rikeleg med arbeid heile året.


Anne Rivenes, frilansjournalist


Midt mellom fjord og fjell ligg dei solvendte liene som på magisk vis gjer Hardanger til Noreg sin eplehovudstad. Eplet spelar hovudrolla, men også pærer, plommer og moreller er ingrediensar i det nasjonalromantiske frukteventyret som alle vil sjå og smaka. På smale vegar langs Hardangerfjorden skaper turistbussar og ryggeredde bubilar dagleg trafikkork. Og midt i eldoradoet ligg Lutro gard, som Kari Lutro overtok i fjor. Ho er utdanna økonom, men har valgt planting, tynning og traktorkøyring framfor kontorarbeid.

Hardt arbeid, fritt liv

– Det likar eg aller best med å vera bonde, å vera ute og arbeida fysisk, seier Kari, og gjev seg i kast med motbakken opp langs endelause rader med frukttre.