Tar vare på landbrukshistoria

Sekkesamling: Kraftfôr og –gjødselsekker frå Rogaland Felleskjøp før fusjonen med Agder Kjøpslag i 1970. Papiret i gjødselsekkene var tjørebehandla og ofte nytta til taktekking.


Er reiskapen lite brukt og har original lakk, spissar Trygve Ødemotland øyro. Då kan det henda 32-åringen ryddar plass til nok ei perle i samlinga si.


Sjur Håland


Ikkje alle hadde kome på å ta vare på ei gjødselskrue frå Kyllingstad. Trygve har to. Den eine er berre brukt tre gonger. I tillegg har han fleire gjødselvogner, også dei svært lite brukt. På eine Kyllingstad Guffen, lakkert i den karakteristiske blåfargen, står ein flik av pakksetelen frå då reiskapen var ny, framleis på.


– Kvar si sjuka, seier Trygve, og smilar breitt.

Arv frå far

Han er far til tre, og driv med rugeeggproduksjon og mjølk saman med kona, Tordis Eline Ødemotland. Men om kvardagane på Torland på Nærbø i Hå er aldri så travle, får han likevel tid til å dyrka hobbyen sin. Det ligg i blodet. Han fortel at faren tok han med på veteranbiltreff i sommarferiane då han var liten.


– Me reiste ikkje til Syden, for å seia det slik. Interessa for bilar, traktorar, Tempo mopedar og –motorsyklar kjem frå far, slår han fast.