Kontroll på sakene: Olaug og Magne Mæland sjonglerer tre produksjonar i fire fjøs. Med planlegging og oversikt, har dei god kontroll.

Har ein plan for det meste

Med god oversikt og planlegging, sjonglerer Olaug og Magne Mæland tre produksjonar i fire fjøs.


Jane Brit Sande


Olaug og Magne Mæland driv gard på Mæland i Bømlo kommune. Begge arbeider fulltid på bruket, der dei driv med sau, slaktegris og ammeku. Dei starta med sau i 1996, og sidan har dei bygd opp produksjonane ein etter ein. Heilt sidan dei formelt tok over i 2016, har Andreas Lundegård frå Tveit Rekneskap, vore deira faste rådgivar og rekneskapsførar. Han vart med Bondevennen på gardsbesøk.

Viktig heiabeite

Sauehuset vart bygd på ei fråskilt tomt i 2006. Der har dei plass til ca. 270 vinterfôra sau. Bøndene har i dag ca. 300 vinterfôra, og derfor har dei ein flokk som går ute fram til januar. Dei sterkaste lamma blir sende på heiabeite i Røldal. Om lag ein tredjedel av flokken får springa der oppe gjennom sommaren. For å gjera sankejobben lettare, har dei investert i radiobjøller.


– Det er mykje arbeid og organisering med heiabeite. Både dugnadsfolk og transport skal i orden, særleg når sauene skal heim. Men heiabeite er heilt naudsynt viss me skal ha så mykje sau, seier Magne.


I år ventar dei 650 lam. Lammetalet var høgare i fjor.


– Eg har alltid mål om å levera mange lam om hausten. Då må me ha mange om våren. Det er eit enkelt reknestykke, seier Magne.