VikingRed: Kua Nytina etter VR Aatami frå buskapen til Valkama Terhi and Pasi Valkeakoski, Harjunsyrjä gard i Finland. Foto: Alex Arkink

Bonden er taparen

Framtida for dei raude mjølkerasane ville sett lysare ut dersom Geno og Viking hadde fått til eit tettare samarbeid meiner Morten Kargo i Viking. – Bonden er taparen, seier han.

Liv Kristin Sola, skribent

Morten Kargo, avlsleiar i VikingGenetics, beklagar at det ikkje var mogleg å få til ein samarbeidsavtale mellom den nordiske avlsorganisasjonen og Geno. Han vil ikkje spekulere i årsaka til brotet, men meiner det er ei tapt moglegheit for dei raude mjølkerasane i Norden.

– Å dele kostnadane for eit felles utbytte ville betydd enormt mykje for avlsframgangen både for NRF og Viking Rød (VR), to populasjonar som trass alt er svært små i verdssamanheng, seier han.

Tapar på konkurranse

Begge avlsselskapa vil tape økonomisk på at det ikkje vart ein avtale, ikkje minst fordi dei no må konkurrere på eksportmarknaden, ein marknad med store kapitalsterke aktørar.