Trivsel: Slaktegrisene har det bra, konstaterer f.v. Laura Lundgaard Jensen, Toralf Gausvik Loe og Silje Svartveit Osmundsen.

Har starta slaktegrisproduksjon i leigd grisehus

Sambuarparet Silje Svartveit Osmundsen (20) og Toralf Gausvik Loe (21) har leigd seg eit tomt grisehus i Sveio. Her har dei starta med slaktegrisproduksjon medan dei venter på å ta over hennar gard.


Sjur Håland


Dei er unge, entusiastiske og fast bestemte på at bondeyrket er det rette valet. På Tjernagel i Sveio har Silje og Toralf nyleg starta opp med å fylla eit stort grisehus, bygd i 2006, med slaktegris. Førebels er to av dei fire avdelingane fylte opp. I dei to andre held dei på å gjera klart til innsett. Ristene skal skiftast og nokre opningar i bingeskilja skal tettast før nye 270 griser flytter inn. Huset dei har leigd var nytta til smågrisproduksjon der bonden som eig huset dreiv ei satelittbesetning. Bonden ynskte å trappa ned. Det passa godt for Silje og Toralf som skal trappa opp.

Møttest på Voss

Silje er frå gard i Sveio, medan Toralf er frå Voss. Begge foreldra hans kjem frå gard, og Toralf har vore avløysar på ein gard i Voss i ei årrekkje. Dei to møttest på Voss jordbruksskule, der dei begge, på kvart sitt klassetrinn, tok agronomutdanning. I februar flytte dei to nyutdanna agronomane inn i eit ledig hus på heimegarden hennar, seks kilometer frå der dei har grisehuset. Foreldra hennar er Gjertrud Svartveit Osmundsen og Gunnar Osmundsen.


– Planen er at me skal ta over garden kring ti år fram i tid, fortel Silje og Toralf.